зэ

I кизил (ягода)

/ И фэкIэ, балийм хуэдэу, плъыжь-фIыцIафэу, хуэкIыхь щIыкIэу, и кум пкъы кIыхь илъу фIэIу-гуащIэ щIэту зейм къыпыкIэ пхъэщхьэмыщхьэщ.

Зэ шхын. Зэр варенэу ягъавэ.

II нареч. 1. однажды

/ БжыгъэцIэ зым къытекIа наречиещ.

* Мащэм зэ ихуэр набгъэщи, тIэу ихуэр нэфщ. (погов. ) Ей, пкIауэ, пкIауэжь мыгъуэ! Зэ улъэри уаIэщIэкIщ, тIэу улъэри уаIэщIэкIщ, ещанэм я IэмыщIэ уихуащ. фольк.

2. когда-либо, когда-то

/ Зэгуэр, зэман гуэрым.

* Хьэжы-Исмел и IупщIакIитIыр губжьауэ фIызэтож: -- Аллахьэ, пщы Аслъэнджэрий, а уи жьэм зэ утекIуэдэжыным уэ. Ш. А. {Дыгъужьым:} - Дапщэрэ бжесIа, Бажэ цIыкIу, си ныбэр щынэщIым укъыздэмыгушыIэ жысIэурэ! БжесIэххэурэ зэ фэбжь гуэр хэпхынущ. Дыщэ кI.

Зэ еплъыгъуэкIэ на первый взгляд.

* Зэ еплъыгъуэкIэ къыпфIэщIынут перс шуудзэр зауэм хуэузэдауэ. Ш. А.

Зэ зы мазэ наконец, в конце концов. Зэ зы мазэ игу къэкIыжын.

Зэ илъыгъуэ один рывок, прыжок.

Зэ мыхъуми зэ когда-нибудь.

Зэ папщIэ кубано-зеленчукские сначала, сперва, вначале.

* Хьэуар къабзэу зэ папщIэ нэм къыфIэщIами, ар къабзэтэкъым. ГуфIэгъуэ. Марят зэ папщIэ хъыбарым иригуфIащ, уаэ аргуэру щIегъуэжащ. Анэд.

III союз то... , то...

/ Зэзыпх - къызэкIэлъызыхь союз.

* Сурэттехым хуэжыIэдаIуэу, Софят зэ щIогуфIыкI, зэ нэщхъ уфауэ зегъэзэж. Щ. I.

VI частица -ка

/ Тегушхуэныгъэ мыхьэнэ иIэщ.

ТIысыт зэ. Тэджыт зэ.

* - Зэ умыпIащIэт, Дисэ, - жиIэри Астемыр фыз IукIыжыну мурад зыщIар къигъэувыIащ, - зыIэжьэ зытIэкIурэ. КI. А.